A cidade de Pontevedra acóllese dende hoxe á Semana Europea da Mobilidade que este ano leva por lema "Mellora o clima da túa cidade". O concelleiro responsable de Mobilidade, Luís Bará presentou as accións que o Concello de Pontevedra ten previsto desenvolver dende hoxe e até o martes, 22 de setembro.
Luís Bará explicou que "esta iniciativa que
ten por obxectivo fomentar a mobilidade sostibel, e iso implica fomentar a redución
do vehículo privado e a promoción dos desplazamentos a pe, en bicicleta e no trasporte público". Segundo a filosofía do Goberno local, que resumiu o concelleiro "Pontevedra, xa deste hai anos, está traballando en
perfecta sintonía co espíritu desta convocatoria promovido pola Unión Europea", é dicir "mobilidade
sostibel que vai máis alá do tráfico e da circulación de vehículos pola cidade,
da convivencia de distintas formas de desplazamento
e a necesaria da reducción do uso do vehículo privado".
Baixo o lema "Mellora o clima da túa cidade" preténdese "contribuir á loita contra o cambio climático
mediante a reducción de CO2". Explicou Luís Bará que segundo os estudos realizados por la UE as emisións
de CO2 en Europa estánse reducindo dacordo cos tratados internacionais asinados
polos países europeos, agás no transporte, polo uso do vehículo privado. Tamén revelan que o
30% dos desplazamentos que se realizan nas cidades son de menos de 3 kilómetros e
o 50% de menos de 5 kilómetros.
O concelleiro de Mobilidade indicou que dende o Goberno local "pensamos que podemos seguir contribuindo
nesta loita contra o
cambio climático. E cando se fala de clima tamén pensamos en favorecer a convivencia,
saúde, a seguridade, a disminución de ruído e a calidade de vida na cidade".
Na pasada edición da Semana Europea da Mobilidade participaron máis de 2.000 cidades, e no
Estado español foron 365 cidades e vilas que se sumaron a esta iniciativa.
Explicou Luís Bará que ao longo destes
anos, "o día sen coches transformouse nunha semana completa coa filosofía de favorecer
medidas permanentes frente a accións simbólicas dun só día. Por iso apóstase por medidas permanentes
como a peonalización, o calmado do tráfico, accesibilidade, uso da bicicleta e
uso do transporte público".
A Concellaría de Mobilidade ten previsto un calendario de actividades para estes días co fin de sumarse a esta Semana Europea da Mobilidade 2009.
- Xoves 17: Visitas á sala de pantaias da Policía Local para
representantes de colectivos e cidadáns relacionadas con esta idea de
mobilidade. O obxectivo destas visitas é informar do traballo que se fai, día a día, na Policía Local en
relación en esta materia, e tamén dos dispositivos especiais de tráfico que se coordinan
desde esta sala, e toda a información que se vai dirixida aos colectivos
para telos ao día das incidencias que suceden no tráfico á cidade.
- Venres 18: Xornada en Bici ao
traballo para promover o uso da bici entre o persoal do Concello. "Xa hai
traballadores que o usan -explicou Luís Bará- e aproveitaremos para facer un encontro ás 8.30 h." Farase un café para escoitar as opinións e propostas para mellorar instalacións
e servizos, ou o uso do Pillabici.
- Domingo 20: Pedalada por distintas rúas da cidade. Comezará ás
12.00 horas na Peregrina e farase un percorrido até a Illa e volta ao centro. Esta actividade xa se fixo con motivo do día da bicicleta pero o concelleiro de Mobilidade pretende incluíla dentro do outono, no inicio do curso escolar coa filosofía de animar á cidadanía a usar a bicicleta.
- Luns 21: Presentación pública da nova avenida de Marín. Será a partir das 20.00 horas no paraninfo do Instituto Sánchez Cantón. Está aberto a toda a cidadanía, non só aos veciños desta zona. Segundo explicou Luís Bará dentro da Semana Europea da Mobilidade "é obrigatorio presentar unha medida permantente que
vaia dentro da filosfoía de reordenación de espazos públicos a favor dos
espazos peonís e sostibeis". O proxecto da avenida de Marín supón unha gran transformación do frente marítimo no que haberá paseos para peóns, carril bici... Na presentación estará o arquitecto da obra.
- Martes 22: Día sen coches. Dado que na cidade xa hai restriccións de
coches e de tráfico importantes, a concellaría limitará este corte simbólico ao último tramo da rúa Benito Corbal, dende Sagasta
a Daniel de la Sota durante
toda a mañá.
Todas estas actividades compleméntanse coa posta en marcha dunha web específica de mobilidade (www.pontevedra.eu/movete) e cunha publicación. A Concellaría pretende que estes soportes teñan información permanente e actualizada para a cidadanía sobre a mobilidade en Pontevedra, a pe, en bici, a motor, sobre educación vial, plans
de dispositivo especiais de tráfico, sobre as grandes infraestruturas previstas para
mellorar a mobilidade, e rutas de sendas e vías verdes (espazos públicos,
parques, beiras do río…)
Na páxina web hai vídeos, infografías, mapas que falan de servizos
relacionados con transporte público, os percorridos máis seguros para o uso da
bici, os puntos de pillabici, os estacionamentos de bici…
Luís Bará asegurou que se trata de ter unha información permanete e ampla para facer un uso da cidade máis armónico e máis sustentabel. De feito, un dos propósitos da Concellaría é fomentar o logo de Pontevedra Mobilidade porque pretendemos
ir máis alá do que é esta Semana da Mobilidade, cuxo único obxectivo é ser un escaparate para
promocionar e divulgar estas iniciativas "pero temos que traballar todo o ano
nestas e noutras iniciativas", asegurou o concelleiro.
