A mellor arte internacional das últimas décadas dáse cita no Pazo da Cultura de Pontevedra
Bruce Nauman, Art & Language, Imi Knoebel, Richard Deacon, Helena Almeida, Jorge Macchi, Boris Mikhailov e Ángela de la Cruz son algúns dos corenta e dous artistas que conforman a mostra Irreversible, unha selección da colección Sánchez Ubiría.
Sabado 12 de Setembro do 2009
Calificada
pola concelleira de Cultura, Lola Dopico, como a mellor exposición
deste trimestre en toda Galicia, ?Irreversible. Dobre cara da
colección Sánchez-Ubiría fai que Pontevedra se poña na primeira plana
das propostas artísticas estatais. A concelleira sinalou a
importancia de que en Pontevedra convivan nestas datas tres exposicións
como a de Man Ray inaugurada onte por Caixanova-, un dos clásicos do
século XX, a de Novos Valores no Museo de Pontevedra-, que é unha
mirada ao futuro-, e Irreversibles, un excepcional repaso por
algunhas das pezas máis representativas dos últimos cincuenta anos no
mundo da arte.
Irreversibles é unha selección da comisaria
María Peña Lombao sobre a dobre cara da colección do matrimonio
conformado por Marga Sánchez e Sebastián Ubiría. Mentres que ela
confesa ser máis lúdica, de aí a súa predilección por obras como as
de Abigail Lane, el se interesa máis pola arquitectura e por aspectos
formais, sentindo especial predilección por unha das esculturas de
Richard Deacon expostas no Pazo da Cultura. Entre ambos creamos un
equilibrio, por iso se mostran continuamente esas dúas partes ao longo
da mostra, afirma a coleccionista.
Nauman como fin e cumio
A sala que abre a mostra é unha síntese das temáticas e propostas que
posteriormente se desenvolven, e unha síntese tamén da colección
Sánchez-Ubiría, conformada por dúas miradas: unha racional e a outra
máis sentimental, unha masculina e a outra feminina.
A
frontalidade e a mirada directa, incluso fría, de obras como a de
Susana Solano conviven coa abstracción ou a intensidade cromática das
pezas de Jessica Stockholder. O impacto vén da man da fotografía de
Laurie Simmons e Boris Mikhailov, mentres que Bruce Nauman pecha a
exposición cunha das obras máis importantes e solicitadas da colección,
o Setting a good corner (Allegory & Metaphor)?. Máis de cincuenta
minutos nos que o artista constrúe un valado no medio de ningures para
preguntarse se iso pode ser considerado arte só por tratarse de Bruce
Nauman.
Un excepcional vídeo que culmina un percorrido expositivo con
outras obras que cuestionan e poñen en xaque os límites das disciplinas
artísticas e da arte en xeral, en especial os da pintura, como as de
Ángela de la Cruz, Imi Knoebel, Katharina Grosse, Miquel Mont ou Helmut
Dorner coa primeira peza na que utilizou resina. Mención especial
merece o primeiro dos bocetos realizados por Art & Language para o
seu coñecido Lenin ao estilo Pollock.
Entre as propostas
fotográficas destaca a de Gordon Matta Clark, compartindo espazo con
outro tipo de deconstrucción, que son as imaxes urbanas de José Manuel
Ballester e Thomas Struth. Ademais, a natureza de Axel Hütte e de Félix
Curto esta confrontada á industria-, as imaxes movidas de Thomas Ruff,
a provocación de Robert Mapplethorpe con metralleta ante a estrela de
David-, ou unha das últimas instantáneas de John Coplans antes da súa
morte. Filipa César e Hans Op de Beeck, pola súa banda, experimentan
coa secuencialidade e as referencias ao cine, do que directamente beben
os vídeos de Matthias Müller.
O humor negro tamén ten cabida
en Irreversible, da man de Fernando Renes e Marcel Dzama, ao igual
que a tensión visual creada por Tunga, ou os exquisitos debuxos de
Jorge Macchi, Waltercio Caldas e Lilian Porter. Un xogo entre debuxo e
escultura é o que propón a obra de Carlos Garaicoa, mentres que a de
Atelier Van Lieshout é un obxecto creado especialmente para a coleccionista Marga Sánchez.
Irreversible está organizada pola Concellaría de Cultura do Concello de Pontevedra e permanecerá
aberta do 11 de setembro ao 15 de novembro no seguinte horario: de
martes a venres, de 17:00 a 21:00 horas; sábados, de 11:00 a 14:00 e de
17:00 a 21:00 horas; domingos e festivos, de 11:00 a 14:00 horas.
|
