O galeguismo do café Méndez Núñez
Non podemos considerar esta unha etapa independente das anteriores xa que non vai diferenciada na liña cronolóxica, pero a diversidade do ambiente lévanos a tratala aparte. Tiña lugar este parladoiro nocturno no Café Méndez Núñez, que daba á praza da Peregrina e á rúa da Oliva, lugar propicio debido á proximidade da casa de Castelao.
Polo ambiente diferente que se respiraba nesta tertulia, máis progresista, máis galeguista, débese destacar asociado a ela un feito que tiña acontecido no 1913: a chegada a Galicia do libro No Desterro, de Ramón Cabanillas. Este libro tería unha fonda importancia en toda Galicia, pero foi en Pontevedra onde ese impacto se notou máis. Algo empezou a moverse en todo o país a partir da chegada deste libro. En 1915, o 18 de maio, quedaba constituída na Coruña a Primeira Irmandade da Fala da que Antonio Villar Ponte sería nomeado conselleiro primeiro. Castelao non tardaría en promover a Irmandade na cidade do Lérez precisamente ó pouco de instalarse en Pontevedra, en 1916. É precisamente o parladoiro do Méndez Núñez o aglutinador de tan amplo movemento de concienciación lingüística e cultural pontevedrés.
Logo de poñérmonos ó corrente de tan sinalado papel, non está de máis que lembremos qué persoas adoitaban acudir ao Café Méndez Núñez: Antonio Iglesias Vilarelle, Claudio Losada, Álvaro Xil, Fermín Penzol, Filgueira Valverde, Manolo Méndez, Valentín Paz-Andrade, Alexandre Bóveda... xente que procedía de ambientes galeguistas ou agraristas.
No Méndez foi onde Castelao xermolou, xunto co escritor ourensán Vicente Risco, a creación da revista Nós, a máis importante da preguerra galega, onde se foron recollendo o máis destacado da producción cultural do noso país naqueles anos. Foi aquela unha tertulia moi activa que deixou outros resultados salientables como a creación da primeira sociedade de estudios sobre Galicia na cidade, que se chamou Labor Galega de Pontevedra.
|
1. 1911. Primeira escala da turné da tuna compostelana 2. De auxiliar de estatística a profesor no instituto 3. Pontevedra decaía... 4. A exótica tertulia do Café Moderno 6. A política e a amargura |